報名玩城市定向 出走藍屋

講到野外定向，相信唔少人細個都玩過，大個咗想重溫舊夢，不妨考慮下孖住朋友仔下個月23日去灣仔，參加聖雅各褔群會舉行「出走藍屋」城巿定向，同近千人一齊探索下灣仔、銅鑼灣、跑馬地隱世地標，仲可以在三區過三關，夾手夾腳鬥快完成每區的關卡挑戰，享受番做大細路的樂趣。好多人前排瘋狂玩《pokemon go》，都發現原來香港唔少隱世地標，所以今次玩城市定向相信無難度，仲可做善事籌款呀！

公關仲話，今次活動分開玩2個鐘的慢活賽，同行足4.5個鐘的挑戰賽，按照組別籌夠800至4,000元，最多可以4個朋友仔一齊出賽，10月2日就截止報名架啦。公關話，好鼓勵參賽者嗰日着埋藍色衫嚟玩，如果造型夠盞鬼又切合到「藍屋」的主題，仲有機會贏埋最佳造型獎。