馬會國際慈善論壇 搵馬化騰演講

港人平時透過香港賽馬會做唔少善事，馬會上一年度就捐款39億元破紀錄，而作為世界第六大慈善組織的馬會，今個月更首次喺灣仔會展中心舉行國際慈善論壇，邀請到60位國際慈善界猛人做講者，包括被譽為「現代商業策略之父」的哈佛商學院教授Michael Porter，仲有全球幾個最大慈善基金，包括騰訊董事會主席馬化騰、著名糖果商吉百利家族的「巴羅吉百利信託基金」第五代傳人Helen Cadbury、Bill Gates的比爾及梅琳達‧蓋茨基金會總監Robert Rosen等，都會分享下科技與慈善發展，可謂粒粒巨星，不容錯過！

商業策略之父 由哈佛訪港

馬會慈善事務部主管（傳訊及聯繫）陳文端（Irene）話，今次係區內首個聚焦城市社會議題的慈善論壇，本月21日舉行開幕儀式，而22日同23日就係重頭戲所在，日日有不同專題討論，有來自9個國家的NGO、大學及商界等代表出席，仲有1,000名跨界別參加者，雖然要買門票入場，但反應踴躍，因為粒粒重量級人物，聽下都「袋錢入你袋」；部分專題亦好實用，好似「如何篩選慈善項目」咁，相信唔少社會投資者都有興趣。