跑樓梯上75層 幫匡智會籌款

每日行多啲樓梯，身體健康啲，仲可做埋善事，一舉幾得。講緊嘅係一年一度嘅匡智慈善跑樓梯大賽，下個月15號於中環廣場舉行。比賽分為29層及75層的個人賽及隊際賽事，話晒跑幾十層樓，睇嚟一眾健兒要飲多啲雞腳湯補下腳骨力備戰啦。

除咗賽事緊張外，當日仲有匡智學員準備精采表演同埋慈善攤位，協助智障人士融入社群；另有匡智關懷大使，包括電影及舞台劇演員BabyJohn蔡瀚億及3,000米障礙賽香港紀錄保持者陳家豪等，幫參賽者打氣。詳情可留意www.hongchi.org.hk/climbathon，9月20日截止啦。