登記成為「小紅星」 做義工儲分換故事書

行街買嘢儲積分聽得多，做善事其實都可以儲分㗎！紅十字會噚日喺新都城舉辦「小紅星獎勵計劃」啟動禮，除請了好爸爸DJ森美做新任「小紅星」大使，仲安排咗啦啦隊為港人打氣，現場亦有小丑扭氣球及畫笑臉彩繪，氣氛好似嘉年華會咁，吸引過百人參加。

講番個計劃，原來家長只要捐150蚊畀紅十字會，小朋友就可登記做「小紅星」，通過做義工活動儲分換故事書同證書等獎品。大會話今年會用「Project H -人道工程學」做主題，鼓勵小朋友做好事體現勇敢、善良及誠實等九種特質，希望會有3,000個小朋友參加，齊齊做個「人道小英雄」。