迪士尼Halloween 搵惡人出巡

距離萬聖節仲有一個多月，香港迪士尼樂園今年提早半個月舉辦Halloween活動，搵一班嘩鬼「反轉迪士尼」，由9月15日開始市民已可入場畀鬼嚇。

聽公關姐妹講，今年迪士尼Halloween主題係「惡人」，入夜後仲搞咗個「迪士尼惡人大出巡」餘興節目，唔少迪士尼為人熟悉嘅「惡人」都會現身嚇人，有幾惡就真係要試過先知啦。唔夠大膽嘅話，建議你選擇早上入場，喺「迪士尼惡人花園」同班嘩鬼selfie下，post上facebook或instagram打卡。

慶祝Halloween又點少得小朋友嗰份？佢哋除咗可參與「迪士尼鬼馬Trick-or-Treat」攞糖果，只要當日打扮得夠出位，仲有機會被邀請參加「米奇Halloween大街騷」，同巡遊隊伍玩埋一份！今年入場門票同舊年一樣：成人539蚊、小童385蚊，65歲或以上畀100蚊就可入場。