黃思麗逢新產品必試 屋企變「迷你一田」

中秋節就快到，相信好多人都煩惱緊送咩禮物畀親友。噚日同一田署理行政總裁黃思麗（Susanna）食飯，佢建議大家送果籃，因為夠大方得體，佢自己都已買咗幾箱日本水蜜桃送畀長輩，長輩見到比拳頭仲大嘅水蜜桃，當堂笑到見牙唔見眼，分分鐘開心過收月餅！

每年最少遊日四次

講開屋企人，Susanna自爆佢同屋企人都係「哈日族」，一年最少去四、五次日本旅行，咁依家做咗署理CEO，就更加近水樓台先得「日本貨」？佢話每個禮拜都會去一田掃貨兩、三次，幾乎一田facebook出現嘅最新產品，佢都會第一時間買，好似刨冰機、小風扇、背囊，加加埋埋都有十幾件，唔單止日用品，一日三餐都喺一田買埋，佢講笑話做咗署理CEO幾個月，屋企已經成功變咗「迷你一田」，果然係忠實fans呀！