麥兜探班《晴報》 派燈籠宣傳新戲

暑假就嚟放完，噚日隔籬位媽咪同事就話屋企囝囝、囡囡要準備開學，搞到無晒心機，所以應承佢哋若果表現好，中秋節就帶佢哋去睇戲。

話口未完，我哋就睇到《晴報》facebook上載咗張相，話有位「大明星」上咗去《晴報》探班。係邊個？咪就係大人細路都鍾意的麥兜囉！有同事仲影住佢帶住塊最靚嘅豬腩肉彈下彈下跳入office，搞到成班同事起哄之餘，又摸又錫又求合照，辦公室快樂指數即刻升到爆燈。

預告帶飯桶救地球

麥兜仲帶埋得意燈籠仔同file送畀《晴報》同事應節，話嚟緊中秋節（9月15日）會喺新戲《麥兜‧飯寶奇兵》帶埋佢發明的電飯寶同大飯寶齊齊打怪獸，實行「飯桶救地球」咁話。麥兜次次有新片上都咁開心盞鬼，帶埋小朋友去睇，肯定可一洗「開學頹喪症候群」啦！