富邦人壽進軍香港 總經理苦練廣東話

過江龍唔易做，來自台灣嘅富邦人壽宣布進軍香港，董事長鄭本源話，籌備近9個月，旗下香港富邦人壽業務正式展開，仲話期望品牌成為亞洲一流壽險公司。噚日去港麗酒店參加開幕禮，從場地布置「春日繁花盛放」就感受到親切魅力。富邦人壽銀保通路處資深副總經理陳世岳話，集團以「誠信、親切、專業同創新」為經營理念，仲話要將台灣經驗帶嚟香港。

開幕儀式後，同香港富邦人壽總經理周資為（Jerry）傾偈，佢一邊分享市場數據一邊show quali，用廣東話同大家傾偈。佢話以前開會多數講英文、國語，知道嚟香港工作，開會就轉講廣東話做練習，唔講都唔覺佢只係學咗幾個月。原來，香港區同事都唔輸蝕，轉channel同Jerry講國語，齊齊寓學習於工作！Jerry又提到，雖然香港壽險市場競爭好激烈，但仍有發展空間，好似根據保險業監理署數字，舊年保費就有雙位數增幅。至於點樣可以打動顧客，佢就有話「Passion is the key」，強調品牌最重視客戶服務。品牌要打入新市場，宣傳當然唔少得，香港富邦人壽首席營銷及市場策劃總監黃嘉琪（Patricia）話，先會透過集團嘅網絡等顧客認識品牌，之後再推出其他宣傳。