詠藜園新店請人 最緊要有心 唔好玩玩下

每次同詠藜園四川擔擔麵店老闆娘楊王小玲（楊太）傾偈，都覺得感動，對佢而言，賺幾多錢都不是最重要，最緊要係有無照顧到員工，利潤係咪回饋咗社會。聽詠藜園代表盛李廉講，為咗年長員工可以「退而不休」，詠藜園未來半年，計劃開設首間「千歲擔擔麵店」，等資深員工以顧問形式工作，培育迎新人兼傳承品牌。楊太話，期望年青人接手「只要新人唔怕辛苦、肯學，會逐步教，食物衞生、廚藝、入貨等知識，到秘方都唔怕教。

盛李廉笑指，「伯樂準備好，急需千里馬」，見到幾位詠藜園員工代表，自然要問下佢哋，招募千里馬有咩首要條件。負責煮麵的駱炳春同負責打麵的黎工成都話，「最緊要有心，唔好玩玩下」。負責炒菜部分的黃定國就認為，一定要專心，先會有進步。

除咗廚房需要新人，飲食業樓面都好重要，負責樓面的黎工成分享工作心得，強調待人接物，最緊要有禮貌。