着住LINE鞋通處跑 下周VANS門市開賣

各位Brown同Cony嘅粉絲留意，事關你哋好快又要大破慳囊喔！點解黛安咁講？皆因最近潮流品牌VANS喺網站宣布，會同LINE FRIENDS首次Cross-over，借幾位LINE主角嘅可愛嘜頭，將VANS經典鞋款重新演繹，喺香港、內地、韓國同新加坡開賣。

一向係Brown粉絲嘅黛安，最鍾意下面藍色嗰款Slip-On，一隻鞋有齊最少十款Brown嘅賣萌造型；我啲同事就鍾意黑白色對高筒鞋款，話有Pattern得來又夠subtle（含蓄）喎；另外仲有兔兔Cony同雞仔Sally嘅綁帶鞋。其實我覺得BB鞋仲得意，可惜我無小朋友，買嚟送畀啱啱生仔嘅朋友都唔錯。

提提大家，呢批新鞋下星期四（12日）喺指定專門店開賣，價錢由590至750蚊，你有無興趣入番對？