K11新藝術展 體驗虛擬實境繪畫

唔知幾時開始，行入尖沙咀K11，唔止為咗shopping或者食飯，有時約人仲會早少少去睇下展覽𠻹！最近跟住K11公關姊妹介紹，親身體驗佢哋最新展覽《電‧藝‧感》（Electronic Vibes）。

近年愈嚟愈多人講虛擬實境技術（VR），今次展覽將藝術同VR結合，大家欣賞唔同作品之餘，仲有機會喺3D虛擬世界畫畫，親身體驗，唔止做觀眾，新鮮得嚟好好玩！好似K11中庭打造嘅虛擬實境（VR）體驗區，仲首次同HTC，以品牌全新虛擬裝置HTC Vive，舉行Art Jamming活動。大家只要帶上VR裝備，四周圍環境即刻變咗你嘅畫布，可以隨意發揮，法國多元化藝術家Valèry Grancher之前都親身示範，用大自然做主題畫畫。

尋視覺音樂創作

除咗體驗活動，K11唔同層嘅「藝窗」會展出視覺音樂項目《五》，由國際知名抽象動畫藝術家兼城大創意媒體學院客席助理教授Max Hattler同36位學生一齊創作，探索聽音樂嘅觀眾受影響時作出的反應。

聽Max Hattler講先知，動畫靈感來自馬勒第5號交響曲，通過顏色和形狀的移動，活現馬勒的音樂世界。