Gentle Monster銅鑼灣登場 旗艦店變火車月台

今時今日眼鏡都係fashion一部分，潮人梗係要有幾款傍身啦！溥儀眼鏡近年同好多潮牌合作，最近再接再厲將韓國人氣品牌Gentle Monster（GM）旗艦店帶到香港！旗艦店今個月23日先正式開幕，前幾日率先預覽，仲見到溥儀眼鏡集團行政總裁邱子傑（Jeffery），佢話裝修完成後第一次全間舖行一次，見到佢微微點頭，睇嚟都幾滿意咁！

打造5個主題區

大家對GM旗艦店好奇，皆因品牌每間旗艦店都有獨一無二主題，好似韓國大邱係Laundry、北京就係Apartment，嚟到香港呢？公關姊妹事先好神祕，原來係火車月台——「The Platform」！行入店內，就感受到品牌好有心思，由門口開始，分咗五個區域，包括車廂、臥鋪室、化妝室、月台同休閒區。無論顏色、擺設都好有復古feel，姊妹話，由主題到細節都係GM團隊有份打造，入到店內除咗試新款眼鏡，真係要盡情影相。

講到眼鏡，Best Seller眼鏡必備元素係咩？溥儀眼鏡集團董事總經理邱子茵（Joyce）話，眼鏡款式設計、顏色、質地缺一不可，仲要戴上去夠舒服、fit面型。一邊介紹，Joyce仲親身示範唔同款眼鏡，想知classic定最新系列啱自己，計我話梗係要去旗艦店自己試下先知啦！

講番影相位，穿過「列車門」，除咗有復古feel十足嘅月台坐位之外，右手邊有電話亭、左手邊仲有個photo booth，拉埋三五知己去買眼鏡之餘，最緊要影番張相留念。