我好後悔「退休」

幾十歲人，第一次學「退休」，十足十學揸車嘅學神，以為講聲「我唔做喇」，放開盤軚，熄匙，乾手淨腳，行得，原來唔係咁，八年半感情，好好好唔捨得，後悔到今日。

做夠，「退休」，幾十年創作到盡頭，回氣唞唞，學李天命話齋：「唔停低享受努力嘅成果，咁同煮咗餐美味佳餚，然後即刻倒咗，有乜唔同喎。」連續親手將啲靚餸倒落屎坑，好後悔咁傻。

無謂人咁講：「唔係個個好似你搵夠。」老婆大人反駁：「唔係搵得夠，係使得少，知慳識儉籌謀。」知夫莫若妻，點解十八歲唔娶大人做老婆，使錢咁少，點解十年前唔「退休」，後悔太遲囉。

「退休」就係想休息，以前唔使無謂應酬，唔使講願景扮領袖，返工六粒鐘已經太忙，全靠同事幫忙，仲可以創作；而家慘囉，farewell飯局、演講、廣告、出書、寫文章，接job傾合約，一支公無停過，仲忙過返工，好後悔「退休」。

推咗四個offer，過百個訪問演講廣告邀約，嫌錢腥咁，但晴報老總一個電話、兩餐飯嘅親切慰問，吩咐開壇寫專欄，字數題材不限，寫乜登乜，仲有稿費X蚊，但困身限時限候，後悔得唔得。

一而再再而三，放棄名利虛銜，違反利益計算，堅決尋求突破，不食人間煙火、只見數字不見人性、目光如豆戀棧權位嘅「高官高層」，咁深嘅道理，點會明。

人間有情，慶幸身邊咁多好人，為我「退休」而肉緊，為我而喊，擔心我夠唔夠錢生活，關心我會唔會悶親，唔滿意我浪費才能，又逼又氹重出江湖，我心存感恩。

一字記之曰「情」，人情味濃得化不開，勉為其難兼隆重其事，專欄開張，破格連登五日，跟住逢周五見人，為期一年，希望大家捧場。