全球最大型體育節 8月亞博館見

噚日JW萬豪酒店出現好多高手！有香港跳繩隊、欖球運動員等，唔通有盛事？聽公關姊妹講，原來全球最大型體育節8月登陸亞洲國際博覽館，一班運動員噚日輪流示範「絕技」，當預演盛事。除咗運動員，前主播伍家謙都有出席活動，皆因體育節搵咗佢做大使，公關姊妹笑住話，以前做開體育新聞嘅伍家謙，同唔少運動員好熟，參加活動好似聚舊。

呢場盛事其實係由美國名人阿諾舒華辛力加發起，吸引世界各地專業同業餘運動選手參與，等大家互相切磋學習。40年嚟活動足跡遍及美洲同歐洲等，單單係舊年就有超過3萬位運動員參賽，競逐55個運動項目。將體育節帶嚟香港嘅Arnold Classic Asia主席Richard Petty話，體育節集娛樂、教育、啟發和互動於一身，每個人都可以盡情投入。

講番活動內容，8月19至21日一連3日喺亞博館會有唔同賽事，仲有超過20個體育互動工作坊，無論智力運動如國際象棋；定舉重、瑜伽、賽艇等項目都有。咁多唔同環節，一家大細都參加得，成人票價$150起，18歲以下同全日制學生票價$80起，12歲以下小童免費入場，詳情可以瀏覽www.arnoldclassicasia.com。