民生90周年晚宴 財爺隔空送祝福

民生書院90周年校慶晚宴噚晚舉行，筵開100席，場面非常鼎盛！食物及衞生局局長高永文做嘉賓之餘，財爺曾俊華人在北京，都專程錄咗段片講生日快樂。財爺笑說，細細個就對民生有印象，因當年喺九龍城讀書，lunch有時去衙前圍道食飯，「見班民生仔女讀男女校咁開心，就諗點解阿爸阿媽要我讀男校」。佢仲大讚民生畢業生遍及各行各業，係香港其中一個重要領袖搖籃。高永文致辭時都讚民生培養數以十萬計學生，無論文、理、科學同體育藝術都有超卓表現。

財爺仲話，民生校友中電企業發展總裁莊偉茵（Quince）搵佢拍片時講起，三代校友合力創作90周年主題曲《光與生命》，連佢都期待3位偶像陳秋霞、林志美同彭羚合唱，佢仲叫Quince一定要擺上Facebook，因為肯定好多人睇。聽講音樂MV製作團隊好強勁，近80位校友參與，好似執導MV導演就係2015年畢業生周宇樞。