海綿寶寶 現身海洋公園夏水禮

夏日炎炎要消暑，玩水係最好選擇。噚日見海洋公園CEO苗樂文同候任CEO李繩宗着住夏威夷恤，就知夏水禮有新嘢！

7月1日至8月28日海洋公園有「海綿寶寶夏水派對」，主角海綿寶寶帶埋班老友例如派大星等陪大家放暑假！苗樂文話，《海綿寶寶》動畫繙譯成超過50種語言、喺185個國家播放過，可以話係全球都鍾意嘅卡通，「相信可吸引更多人入場」。睇完布置就覺得吸引，唔怪得李繩宗會講，「即使市道唔好，估計今年夏水禮入場人數都會同舊年相若，預期約有180萬人次。」

講下夏水禮嘅「濕身」設施，公關姊妹話，今年年首度由美國引入「激光迷陣」同首度登場嘅「珍寶肥皂泡工場」，等大家自製「真人咁高」巨型泡泡影相「呃like」。如果仲唔夠激，可以去「海洋全接觸」嘅浮潛體驗，係水底欣賞熱帶珊瑚魚！