Wildfire意式炸薄餅 拿坡里地道風味抵港

呢塊脆卜卜嘅係薄餅？公關姊妹話，Wildfire推出嘅Pizza Fritta意式炸薄餅，係意大利拿坡里經典街頭美食，直徑有16吋㗎。原來Wildfire慶祝喺香港成立6周年，特別搵師傅去當地取經，話要將最地道味道帶到香港！

負責「取經」嘅係Wildfire分區副主任廚師蔡嘉智，今年3月時專誠去拿坡里嘅「拿坡里薄餅公會」學習地道手藝。姊妹話，食一啖就會深深愛上，講到咁好味，Fritta係咩？原來Fritta喺意大利話係「炸」嘅意思，起源追溯到拿坡里街頭，小販難用焗爐整薄餅，於是有油炸Pizza嘅出現。炸薄餅要好味有好多工夫，聽講Wildfire用意大利最幼細同優質嘅00級麵粉，搓成麵團經過手拋程序，鋪上芝士同餡後，再用另一層薄麵團封好先可以炸。姊妹話，食Pizza Fritta「更高境界」可以配冰凍啤酒。