「黑暗中對話」特別版 青衣城率先登場

收到公關姊妹消息，「黑暗中對話」首度進駐購物商場，喺港鐵商場青衣城登場。星期五開始，「青衣城至Smart夏令營」暑期活動同黑暗中對話合作，推出全新觸感溝通體驗，等參加者透過聽覺、觸覺和親身體驗視障運動員感受。

「黑暗中對話」CEO朱月如（後排左二）話，黑暗中對話喺香港舉辦咗7年，今次係大膽創新嘗試。負責設計活動嘅「對話體驗-黑暗中對話國際培訓導師」朱閩就話，奧運係四年一度盛會，活動特別用「巴西運動嘉年華」做主題。參加者要喺黑暗中穿過叢林，走進運動場館參與球賽。主辦單位仲搵咗兩位視障運動員為活動揭幕，分別係三項鐵人視障運動員朱健驊同高爾夫球視障運動員黃美玲。前者舊年去台灣參加三鐵，成功戰勝14名健全人士勇奪冠軍；後者今年5月喺日本出戰「2016九州盲人高爾夫球友誼比賽」，拎到女子組亞軍。