韓化粧護膚品牌 逆市擴充 AMOREPACIFIC成功靠革新

集團嘅實力，除咗講數字，仲可以睇旗下品牌。好似韓國最大護膚化粧品集團AMOREPACIFIC，旗下30幾個品牌，雖然只係帶咗4品牌嚟香港，包括集團同名皇牌品牌AMOREPACIFIC HONG KONG（APHK），每個品牌喺市場有一定地位。正如APHK市務總監鄭載歡（Jeff）講，每個品牌有獨特個性之餘，都會跟住集團理念去做，希望做到「A more beautiful world」。

增聘人手 推創新產品

正當大家以為零售市道吹淡風，Jeff話集團無受影響，更可以話係逆市上升，今年仲陸續有擴充。雖然集團好少講銷售數字，但從「側面」嘅數據，黛安估計品牌成績應該不錯：「人手方面，預計增聘20％即約100人；目前4個品牌本港，計埋專櫃、水療中心等，約有55個零售及服務點，年底會增至60；另外數據顯示，今年首季化粧品類別推廣宣傳開支跌約3成，但APHK未有減幅，全年投放資源仲會增加」。計劃請多啲人、開多啲舖、做多啲宣傳，信心滿滿咁，Jeff話全因集團一心要成為「Asian Beauty Creator」，做「亞洲之美」帶領者。

問點樣逆市突圍，Jeff話集團品牌有個重要理念─「Innovation」，「要不斷革新，例如APHK用高科技提煉天然草本精髓；LANEIGE推出睡眠面膜、cushion粉底、雙色唇膏；雪花秀推出肌底液；ETUDE HOUSE走『fast cosmetics（速食美粧），不斷有新產品。」多款產品成功帶起潮流，其他牌子當然推同類型產品迎戰。Jeff強調，就算有品牌推出同類型產品，都只係followers，再靠打價格戰，但價格戰不可能長久」。