薛家燕 林奕匡撑百佳、惜食堂 捐食又捐錢

噚日去香港仔，見到百佳總經理曾金強（Victor）同惜食堂創辦人董愛麗（Gigi），原來兩位特登去參加惜食堂與百佳合辦嘅「全城傳愛齊捐食」嘅啟動禮。

之前都分享過，百佳同惜食堂今年再次合作，舉辦全港最大型嘅食物捐贈計劃「全城傳愛齊捐食」，全港市民可以去百佳及旗下品牌約280間分店，捐贈六款指定食物，包括米、油、粟粉、米粉、罐頭及燕麥，百佳會再送到惜食堂用嚟製作熱飯餐，送到有需要人手上。

活動今年踏入第三屆，Victor話，前兩次成績都好好，希望今次再有突破，「愈多食物愈好，可以幫助有需要嘅人。」

聽講品牌今次仲非常落力支持，分店會收集任何地方購買、任何品牌嘅指定食物，但如果大家捐出嘅係佳之選品牌，百佳就會再捐多一件。

講番活動啟動禮，佢哋仲請到藝人薛家燕同歌手林奕匡做嘉賓，家燕姐好有心，唔止出力呼籲大家支持，仲捐埋錢，身體力行！林奕匡仲分享咗佢最近去惜食堂做義工，幫忙裝飯，大讚活動好有意義！