陳永堅孖太太義賣熱狗 籌33萬幫長者裝智能廁板

同煤氣公司管理層食飯，知道佢哋一向熱心慈善，黛安不時都有留意。其中一個令人印象深刻，就係煤氣公司常務董事陳永堅同太太合作，帶住員工一齊炮製熱狗喺公司義賣，為「電動智能廁板捐贈計劃」籌款。聽公關講，今年「2016永堅園Mad Dog溫馨暖意慈善活動」，佢哋唔怕廚房熱辣辣，整完珍寶熱狗再煮腐竹薏米蛋花糖水，總共賣咗650份熱狗加糖水套餐向員工籌募善款。

老闆都出動，同事當然更落力，公關話今年搞搞新意思，加入「慈善健康果汁活動」，同事體驗透過「人力發動的單車攪拌機」，自己出力踩單車炮製健康果汁。兩項活動喺大家踴躍參與同慷慨捐輸下，破紀錄籌到33萬！據黛安所知，活動籌款方法係「等額配對」，簡單啲講，同事捐10蚊，陳永堅就捐10蚊，煤氣公司再根據兩者加埋嘅數目，再捐20蚊，真正有錢出錢，有力出力！善款會直接用於為有需要安老院舍和殘疾人士服務機構安裝智能廁板，改善長者同有需要人士生活質素，計劃2013年推行至今，為近50間慈善機構贈送及安裝電動智能廁板超過180塊。