7-Eleven推LC「鍋」心餐具 下周三有得換

記得舊年《晴報》同人氣廚具品牌Le Creuset（LC）合作送LC鑄鐵鍋，反應好熱烈，睇得出大家超級鍾意LC。噚日收到message，未睇字淨係睇相，黛安都「嘩」出聲，一套十款7-Eleven x Le Creuset小「鍋」心餐具，集齊刀、叉、匙羹同筷子，又靚又實用，真係沒有不換的理由！

黛安記得，以前聽7-Eleven姊妹講過，每次換購都想粉絲有新鮮感，除咗換嚟儲，仲想大家覺得實用。今次佢哋破天荒同LC合作，除咗貫徹設計夠美觀，用途仲好多！十款餐具入面，餐刀、餐叉、匙羹各兩款，筷子就有四對，每件餐具配埋一個同色嘅LC迷你鍋。呢個「小鍋子」都唔係得個睇字，可以保護餐具又係筷子托，唔用時仲可以做裝飾！18個印花免費隨機換一款，或者7個印花加22蚊都可以隨機換一款，下星期三早上七點見！