ViuTV開台造勢 請《太陽的後裔》雙宋訪港

近日每次開電視都好期待，事關下星期三（4月6日）開始就有多個選擇，可以睇到全新免費頻道ViuTV。噚日黛安同ViuTV總經理魯庭暉食飯，佢笑言連外母都唔太知佢做緊乜。黛安明白佢嘅感受，五年前《晴報》創報，坊間都對免費報紙市場持觀望態度，但憑着編採、市場及廣告等多個部門協力，《晴報》漸為人所認識和認同。今日嘅ViuTV亦然，要挑戰一個歷史悠久嘅大台，魯庭暉直言呢個係一個「歷史使命」。黛安相信只要做好每一個環節，自可得到觀眾認同。

除咗自家炮製嘅《跟住矛盾去旅行》外，唔少觀眾都期待ViuTV開台後追看大熱韓劇《太陽的後裔》。魯庭暉透露下星期二（4月5日）請咗該劇主角「雙宋」（宋仲基和宋慧喬）訪港造勢。黛安聽見都好興奮，未知有無機會可見偶像一面呢！