迪士尼朋友制服「有秘密」 雞蛋仔蛋撻藏香港情懷

同迪士尼朋友影相集郵，係迪士尼粉絲入園重要任務，唔知大家有無諗過，一眾迪士尼朋友嘅服飾由邊個設計呢？黛安最近先知，原來香港迪士尼樂園表演者同迪士尼朋友嘅衫，背後由年輕、本地設計師刀。迪士尼高級服裝指揮梁翠碧（Elsa）加入迪士尼十年，在演藝讀舞台及服裝設計的她，初加入迪士尼打算「見識下」，當時以組長身份負責園內表演節目如《獅子王慶典》等。佢同黛安講：「讀書時鍾意睇舞台劇，鍾意到好想參與幕後製作，如設計舞台服裝。」有志者事竟成，加入迪士尼第四年，有機會一償心願，為園內表演者如巡遊的dancer設計表演服飾。

「多謝上司信任，有機會不斷學習及試新嘢」，拎住設計圖介紹同講起得意作品時，Elsa表情非常開心，看得出她很熱愛自己的工作。佢仲同黛安分享咗十年工作生涯中，又一個「首次」嘗試，原來Elsa與團隊今年首次有機會為迪士尼朋友設計服飾，「係全新嘗試，好多不同之處，例如服裝details位要更誇張，希望迪士尼朋友企喺街頭，大家就算係街尾都見到。」

Elsa同團隊第一次，亦係香港迪士尼樂園第一次，因為新服飾主題係「Hong Kong Unique」，新衫上面會因應迪士尼朋友性格，加上香港特色標誌、美食同交通工具等。Elsa話自己最鍾意小熊Duffy同ShellieMay嘅設計，「我哋特別將雞蛋仔同蛋撻整得比較卡通同立體，襯番佢哋可愛嘅性格，同時帶出香港情懷。