卡樂B即炸薯片 必試避風塘香辣味

薯片有得即炸即食！噚日開始灣仔利東街有得食！黛安之前分享過，四洲集團將Calbee Plus帶到嚟香港。行入新店左手邊透明玻璃後，係開放式廚房，一班工作人員正落力準備，黛安睇住炸薯片經過輸送帶，再由工作人員裝好畀我哋試味，夠晒新鮮！

海外首店 望5年開4間

黛安見到四洲集團傳訊部總監劉碧琪（Peggie），當然要八卦一下公司仲有咩計劃。Peggie話，集團睇中Calbee Plus潛力，傾咗一段時間，終於將品牌帶到香港，仲話期望五年內有望開四間分店。Peggie仲好有信心：「對呢個品牌好有期望，因為卡樂B係香港有好多粉絲，食到新鮮炸嘅薯片係不同體驗，除咗體驗，仲想將開心快樂帶畀大家。」講起「出爐」薯片，Peggie笑說，喺日本每間Calbee Plus都會根據地區特色，推出地區限定味道薯片，嚟到香港當然保留呢個特點，新店揀咗避風塘香辣味，有平切同波浪切兩款，點解推避風塘味？Peggie話：「香港以前係漁村，想用番呢個特色」。