Canon印出工藝品

話咁快又一年，上星期黛安出席佳能香港（Canon）年度展覽會，展示品牌最新產品系列，同示範各種高端技術應用等。今次展覽會主題係「Passion in Color」，同品牌形象好襯。每次見到品牌一眾老友，聽佢哋分享最新「行情」，次次都學到嘢！

好似今次同佳能香港商務影像方案部及數碼印刷部總監陳志剛（Philip，圖左）講起，品牌推出OcéArizona系列打印機推出，改變大家以為印刷只可以紙上進行。品牌近年嘗試將呢個concept普及開去，除咗製作公司，亦鼓勵攝影師、設計師、甚至建築工程師嘗試呢項打印技術。

Philip又講起，工業印刷方面創意可以更大，舉例用馬賽克形式砌工藝品，可能需要好多時間同成本較大，利用「堆疊」技術，可以打印出2.5D效果，應用喺家居裝修方面，成本平好多。

展覽會當日，品牌仲搵咗香港專業攝影師聯網創辦人Ming N同大家分享，將作品打印喺鏡面鋼上面，「相片喺香港機場展出，防火物料要求好高，唔可以用一般物料」。Philip就補充，展覽用同家用「Display級數唔同，如果家用裝飾，打印後就要加coating」。