3香港何偉榮：派數據卡雙贏宣傳

同和記電訊企業及市場傳訊總監何偉榮（Raymond）飯聚，講3香港「派卡煲劇」宣傳如火如荼進行中，Raymond笑言，「為加強品牌『Better at 3』形象，舊年投放唔少資源喺客戶服務方面，呢排就聚焦網絡服務。」

黛安之前分享過，下星期二品牌會派發過萬張5GB數據卡，Raymond話今次係雙贏宣傳手法。大家拎住張5GB卡，除咗快人一步知道新App點用同好唔好用，仲可以親身體驗一下3香港嘅4G網絡，「有時大家對於網絡質素load得快唔快、畫質清唔清都係聽人講，派張卡畀大家用嚟煲劇，一試就知，唔係淨係聽人講。」

此外，品牌亦都好錫住班顧客，3香港現有4G客戶，唔使等派卡，只要4月17日前下載「myTV Super」手機App，個個都可以率先體驗一個月㗎！