微電影谷人氣 星展粉絲數衝700萬

銀行做宣傳，多數會講銀行服務、新計劃、新產品，有無諗過有銀行會話「Live more, Bank less」？噚日去金鐘食lunch見到星展銀行嘅管理層，原來品牌今年好揼本，投資八位數字做branding，包括噚日開始播出嘅三集微電影。

星展執董兼集團推廣策略與傳訊部總監朱伊蓮（Glendy）講到，集團理念係「Making Banking Joyful」，星展希望旗下產品同服務幫到客戶之餘，鼓勵大家活出精采人生，微電影《Sparks綻放精彩》最想強調呢一點。Glendy仲話，依家星展係亞洲區社交媒體平台合共大約有600萬粉絲，希望微電影拉近銀行同客戶嘅距離之餘，可以帶動人數增長，仲話期望2016年衝破700萬大關！

黛安聽星展董事總經理兼企業及機構銀行總監張建生（Alex）講先知，今次微電影特別在由真實故事改編，觀眾可以睇到星展客戶經理工作真實情況，一方面了解客戶生意機遇，一方面要說服公司內部同事。