香港寬頻睇myTV Super 月費最平$148

呢拉排個個講緊免費電視大戰，唔少朋友飯後話題都講起，「買邊個盒子好？」有人話睇吓package先啦，黛安噚日就收到香港寬頻同TVB合作嘅消息，聽完真係覺得好吸引！香港寬頻CEO楊主光好有信心，推出最平月費$148「光纖寬頻＋myTV SUPER組合」搶客，仲話有望今年可以吸客40萬，兩年內目標要增加至100萬。

想吸引觀眾，速度重要，內容更緊要。TVB執行董事及總經理鄭善強就話，myTV SUPER唔係揀一部分節目放上網，而係全部內容都會，30條直播頻道加埋有過萬小時嘅節目。佢仲話，未來會逐步增加4K超高清節目，叫大家一定要買部65吋電視感受一下。