歎Lawry's燒牛肉老闆教「連骨上」

餐廳最重要當然係食物，但服務水準都keep到一流，客人先有perfect體驗。上星期去美心旗下Lawry's The Prime Rib食飯，一行入去有個女仔同黛安打招呼，原來係餐廳助理經理Coco。上次見面係大半年前黛安同媽咪慶祝生日，估唔到佢咁好記性。

Lawry's招牌係特級燒牛肉，每次幫襯黛安都會柯打「The Lawry Cut」，仲會叫廚師「連骨上」，習慣源於一個小故事。話說前年同美心創辦人之一、美心集團名譽主席伍沾德伍老先生食飯，佢教黛安：「食Lawry Cut一定要叫廚師連骨上，兩隻手拎住條骨食先最好味！」餐廳負責人阿Ken都記得伍老先生教我的食法，真的好佩服佢哋以客人為先嘅理念。講起食物，唔可以唔提品牌一向強調用餐體驗，廚師企喺價值數十萬嘅銀色餐車前，因應客人要求，切出你想要嘅燒牛肉。除咗Lawry Cut，仲有「牛魔王」至愛Diamond Jim Brady Cut、「細食之選」English Cut等。黛安同大家分享完，已經掛住佢哋嘅食物啦！