一家大細跑住學海洋保育

噚日朝早經過科學園會見到大批「海洋生物」跑晒上岸，其實佢哋係香港海洋公園保育基金「生態保衞賽」慈善跑參加者。特別嘅係今次比賽時間緊要，沿途分辨出「敵人」同樣重要，因為賽道上除咗垃圾同漁網等阻礙，仲有「海洋殺手」追捕，想順利到達終點唔係咁易！

香港海洋公園副主席劉鳴煒今次都親身上陣，完成10公里計時挑戰賽同埋「領袖杯」3公里邀請賽，佢話喺賽道上畀海洋殺手窮追不捨，非常驚險，跑完之後都有感而發：「海洋失衡問題日趨嚴重，希望大家透過活動了解海洋垃圾、過度捕魚及海洋污染等三大海洋威脅。」保育基金主席陳晴頒獎時都話：「慈善跑為保育基金籌款支援亞洲野生生態保育工作之餘；小朋友同家長仲可以一齊學到保育知識！」