皇帝look引娜姐請上台

美國樂壇天后麥當娜（Madonna）巡迴演唱會風靡萬千樂迷，繼歌手Eason（陳奕迅），前晚澳門新濠影滙舉行第二場《Rebel Heart Tour》，天后再邀請粉絲上台「狂歡」，呢晚最特別係呢位粉絲以「皇帝look」上台！

黛安睇到相嗰時，覺得佢好熟口面，望真啲，原來係廣告公司PHD HK行政總裁阿Ray（黃國柱）！噚日即刻打電話同佢確認一下，Ray都話「夠晒眼利」。聽阿Ray講，佢今次淨係睇咗港、澳各一場，「香港嗰場都有帶套衫去，不過換唔切，今次一於入場前就換晒全套，連頂帽都無除過，都幾熱㗎」。計黛安話，可以上台同娜姐「狂舞」一番，幾熱都抵晒啦！佢就話，最緊要好玩，仲大讚娜姐好fit、好努力，「以佢嘅年紀好唔容易」。

原來要吸引工作人員眼球唔易，全靠佢着住件咁突出嘅衫都落力跳舞，工作人員仲問咗唔少問題，例如識唔識跳舞、上台可唔可以再跳落力啲等等。佢仲話，原本準備咗利市要畀娜姐，上台又唱又玩，緊張到唔記得咗！