迪士尼教長者義工講故事

啱啱個農曆新年，大家拜年之外有無關心下身邊嘅人？聽公關分享，年初一香港迪士尼樂園一班長者義工，就去咗樂園「大顯身手」！

原來舊年11月開始，迪士尼就同聖公會合作，組織一班退休長者，參加由專業迪士尼義工隊教授說故事秘訣、溝通技巧等義工課程。第一批大概30名「長者關愛大使」完成10個鐘培訓後，已經去過社區參與「說故事」同探訪獨居長者等義工服務。趁住猴年大年初一，長者義工發揮所長，同20位保良局受助小朋友，即席分享迪士尼幸福故事，宣揚長幼共聚呢個快樂信息。

出席新春團拜嘅迪士尼CEO金民豪都話，長者義工熱心地將技巧傳授畀人，又話「香港迪士尼樂園目標係透過專業技巧，將義工服務做得更好，激發社區正能量。」