芝麻羔「突擊」《晴報》編輯部

收到姊妹傳相，《晴報》專欄作家芝麻羔噚日去咗佢哋office，仲拎咗自家出品月曆做手信𠻹！姊妹話，office同事起哄之餘，個個捉住佢要親筆簽名，仲「臨場加映」畫公仔，個個勁開心！

黛安記得去年年尾芝麻羔整親腳，要休養一段時間，同佢傾開先知，嗰次「唔覺意肌肉撕裂」，「做咗一個幾月物理治療，幾乎日日去」，好彩依家好得七七八八。在家休養期間，仲有喜訊，就係細仔12月出世啦，芝麻羔再次做爸爸！

回饋粉絲趕製月曆

講下講下，唔怪得佢咁忙啦！芝麻羔講起，原來今年無再合作出月曆，因為怕時間太短做唔切，不過後來好多粉絲都問點解搵唔到2016年月曆嘅？深受粉絲熱情打動，芝麻羔於是拿拿臨趕工，「好多謝粉絲一路咁支持，連我話要一月中至月尾起貨都肯等。」佢仲畀video黛安睇，之前寄出大家訂購嘅月曆，除咗佢親手畫一些插圖，背後仲有一位「得力助手」，就係4歲半嘅大仔「芝麻B」。可愛嘅芝麻B貼完郵票，仲負責蓋印，認真叻仔！芝麻羔仲話，今次自己一手一腳整，除咗透過fb專頁訂購，部分會送畀慈善機構，志在回饋大家支持，「都無計自己人工，唔蝕錢都ok吖」。