克服愛貓離世傷痛 袁文傑豁出去再做貓奴

袁文傑愛貓「囝仔」於2019年離世，當時令文傑心情大受打擊。去年他調整好心態，與太太張潔蓮商量後，決意接受好友贈送的異國短毛貓「Saka仔」，重拾人貓情。文傑接受《晴報》訪問時稱︰「佢（Saka仔）愈大，就同我哋愈多互動，每日見到佢都會好開心。」撰文︰Steven美術︰梁政敏

袁文傑接受本報訪問時，披露曾拒絕收養Saka仔，他表示︰「當時囝仔唔係離開咗太耐，所以我拒絕咗；但後來朋友再畀Saka仔啲相我睇，覺得好得意。」他表示可能覺得Saka仔合眼緣，自己又收拾好心情，與太太決定收養當時約三個月大的Saka仔。

再養寵物後，文傑直言家庭生活截然不同︰「佢愈大就同我哋愈多互動，每日見到佢都會好開心。佢係一隻叫唔停嘅貓，好識表達自己，試過喺屋企不停咁叫，一定要我哋睬佢先收聲，唔會『喵』兩下就算。」

讚Saka仔生性倍感安慰

文傑讚Saka仔的性格如同小狗，十分有靈性，「問佢食唔食嘢，又會『喵』兩聲答人，我哋覺得佢講緊『好吖、好吖』。佢又會成日纏住人，仲識得開躺門，睇下我哋搞緊咩。」文傑特別分享與Saka仔的窩心事︰「試過手機彈出囝仔嘅舊相，我忍唔住叫囝仔個名，Saka仔聽到聲，就過嚟我身邊叫咗幾聲，好似代哥哥安慰我咁，嗰刻真係百般滋味在心頭。」事實上，文傑不時到無家毛孩組織「大樹下善待動物庇護站」做義工，又會提供金錢資助，極具愛心。