6歲練蔡李佛拳 鄭俊弘獲楊盼盼認證有功架

剛升呢人夫的鄭俊弘（Fred），昨日聯同鄧卓殷、郭子豪及李君妍等，為明晚舉行的《萬千星輝賀台慶》功夫項目綵排，前輩楊盼盼擔任動作設計及顧問。楊盼盼對一眾後輩的身手十分滿意，當中最欣賞Fred的表現，大讚對方功架十足！

鄭俊弘與鄧卓殷等昨日綵排時拳來腳往，十分有睇頭，眾人起飛腳合照時亦穩打穩紮。往年為台慶多次表演高難度動作的楊盼盼，今次不會演出，只設計藝員動作，昨日亦在場檢視他們的表現。

楊盼盼大讚一眾年輕藝員身手不凡，她說：「個個藝員本身已經有功夫基礎同潛力，將會喺表演項目上發光發亮，佢哋等緊個力量爆發出嚟。」

楊盼盼坦言有功夫底子的Fred，令她最為印象深刻：「Fred好有蔡李佛嘅功架，打起上嚟好有勁度。我好鍾意睇藝員嘅表演，佢哋其實有好多專長，每個人打嘅風格都唔同。」

台慶表演連打5塊板

Fred十分開心得到楊盼盼的讚賞，外表斯文的他，原來自六歲起已學習蔡李佛拳：「我都仲有啲（蔡李佛）基礎，不過近年都少咗練習，綵排再練番即刻腰痠背痛！好彩呢幾日練多咗，肌肉開始習慣，表現更加好，我都會繼續keep住練。」問他明晚要即場表演可會緊張？他說：「其實最緊要睇狀態，依家還好，唔算好緊張。我正式表演嗰陣要連續打五塊板，希望到時順利打得晒！」

採訪︰Pauline

攝影︰林良明

編輯：李潔盈

美術：梁政敏