誕細仔後現身曬身材 陳凱琳未敢太快追女

陳凱琳（Grace）自今年七月誕下細仔鄭承亮（Yannick）後，昨日首度現身公開活動。選擇餵哺母乳的Grace，上圍明顯升cup，她坦言照顧兩個兒子感覺吃力，所以對於會否再追女兒，只會順其自然。

陳凱琳昨日身穿一襲白色低胸連身裙，亮相珠寶拍賣活動，谷胸上陣的她配襯名貴珠寶，大曬事業綫。她笑說：「我99%時間都係着睡衣，陣間見完大家，就趕返去湊小朋友。」誕下細仔兩個多月的Grace身形纖瘦，唯獨上圍豐滿不少，她笑言︰「Well，有好有唔好，BB食人奶抵抗力好啲、健康啲，雖然每兩、三個鐘就要泵奶，但都值得。」

目前專心照顧兩個兒子，Grace坦言時間分配較難，壓力不小，幸好老公鄭嘉穎不用開工時會幫手湊仔，令她可以輕鬆一會。問到大仔鄭承悅可有因弟弟呷醋？她說：「暫時都無，大仔知道屋企多咗個小朋友，但佢太細個，未識幫手照顧細佬。」問Grace打算再追女兒，或是正式封肚？她笑說：「唔敢講呀，順其自然啦，現階段真係好忙，想照顧好兩個仔先，如果太快生第三個，會覺得對兩兄弟唔住。（嘉穎想追女？）佢都話睇我，但現階段都係focus兩個仔先。」

否認離巢無綫

另外，有傳Grace離巢無綫？她即否認︰「唔知邊度傳出嚟，可能見我少咗喺幕前就會有人講，我同公司仲有合約嘅。（公司搵你傾續約？）呢排除咗講湊仔，無人敢問我其他嘢。」Grace強調沒有刻意減產，但湊仔實在分身不暇︰「我同嘉穎一個開工，另一個湊仔，兩個同時間做嘢就難啲。」至於談及她的生意拍檔雪姨，以950萬元買下林燕妮故居，Grace即說︰「要問番佢，我真係唔知。」

撰文︰倪小珊

編輯︰李潔盈

美術︰梁政敏