吳剛稱患新冠肺炎 薛家燕︰打中港電話都搵唔到佢

薛家燕、范振鋒及鄭俊弘（Fred）等前晚錄影音樂節目《流行經典50年》，家燕姐面對疫情未敢鬆懈，每次工作都做足防疫措施。有指久未露面的吳剛師傅患上新冠肺炎，家燕姐表示聯絡不上對方，暫未知對方的情況。

身穿黃色晚裝的薛家燕，配上銀色口罩加銀戒指，她自爆連內衣都襯埋色︰「我由內到外都襯到絕！因為《流行經典50年》受歡迎，公司搵設計師幫我設計造型，好多靚衫着。」談到家燕姐經常穿低胸裝，會否考慮擴大性感尺度，嘗試曬腿？她笑說︰「當然可以露，不過我呢條係美腿，唔係金華火腿。」

新冠疫情仍然肆虐，有傳拖欠他人演唱會門票退款的吳剛師傅，今年四月自稱確診新冠肺炎，在深圳留醫。家燕姐表示彼此已沒聯絡兩年︰「我見新聞話佢感染新冠肺炎，我想打畀佢問候下，但仲未搵到佢。可能佢身體唔係咁好，希望佢早日康復。」吳剛師傅是否長居內地？她說︰「唔知道，我打晒佢內地同香港電話，都搵唔到佢。」

返新城開咪大陣仗

上月新城電台出現新冠肺炎確診個案，身為新城主持的家燕姐，一度自我隔離及在家中主持節目。現已重返電台開咪的她，表示因好友開設消毒公司，所以特意幫她到直播室全面消毒，讓她在安全環境下安心開咪。范振鋒是家燕姐的電台節目拍檔，他感激指早前急需做新冠病毒測試，幸得家燕姐及朋友幫忙安排，才能縮短輪候時間。

另外，有份主持《流行經典50年》的曹永廉，在網上指老友蕭正楠太太黃翠如是「自己友」，令翠如惹上政見風波。曹永廉前晚有份錄影，但沒有像平日般現身拍照及接受訪問。家燕姐笑言可能前晚打風，所以對方趕住離開。

採訪︰Pauline

編輯︰李潔盈

美術︰梁政敏

攝影︰林良明