低胸現身《流行經典50年》 馮盈盈寧願性感拒獻Sing

新劇《反黑路人甲》演員馮盈盈、王浩信及張振朗等，前晚錄影音樂節目《流行經典50年》擔任嘉賓。穿低胸裙上陣的盈盈笑言並非想與主持薛家燕對撼，她又自認歌藝麻麻，所以拒絕獻聲，惟有着靚啲搭夠。

馮盈盈前晚性感示人，她笑說︰「我都係尊重場合，因為個舞台好華麗，雖然我無份唱歌，但配合視覺效果。」她笑言上次出席《流行經典》是為張頴康伴舞︰「今次我就參與傾偈環節，所以認真打扮下，加上同劇嘅演員歌藝精湛，令人聽到如癡如醉，始終我嘅歌聲唔及其他人咁好，或者我返屋企好好練習下，今次真係唔好獻醜啦。」

至於歌手出身的王浩信，前晚獻唱《古惑仔》歌曲《甘心替代你》，他透露在劇中會獻唱這首歌，所以前晚特意再唱一次。提到他在《反黑路人甲》第一集獻唱意大利歌劇，他笑說︰「呢隻歌叫《我的太陽》，我練咗一個半月，隻歌本身好長，不過播出街時cut咗大半，如果收視過30點，我再唱成首畀大家聽。」

王浩信獲譚詠麟加持

提到王浩信在劇中扯開盈盈恤衫，令對方爆衫兼露出黑色胸圍，可惜香艷鏡頭一秒即逝。浩信笑說︰「呢場戲係講我想用頸巾，幫盈盈抹走嘔吐物，點知一掃佢件衫粒鈕就自動鬆開。」盈盈大讚浩信拍攝時甚有風度。

另外，「樂壇燈神」譚詠麟（阿倫）在微博向王浩信點燈，大讚《反黑路人甲》用上漫畫拍攝手法，角色性格鮮明，編劇組應記一功。阿倫更大讚浩信的角色「有黃子華及周星馳的混合體」，相信故事會愈來愈精采。

採訪︰Pauline

攝影︰林良明

編輯︰李潔盈

美術︰梁政敏