「明湯戀」好啱傾 認定結婚對象 湯洛雯細數馬國明5大優點

「鑽石級筍盤」馬國明認戀湯洛雯（靚湯），獲得全城送上祝福；繼馬明前日甜絲絲大談「明湯戀」後，昨日輪到靚湯暢談新戀情，春風滿臉的她公開大讚馬明有五大優點，直認雙方都是朝着結婚方向發展。對於全面從黃心穎身上接收了事業和愛情，靚湯毫不介意地稱︰「係緣份，我同佢（馬明）都無咁樣計劃過。」

46歲的馬國明與年輕13載的湯洛雯用愛心「煲」出「明湯戀」，成為全城熱話，就連靚湯爸爸湯鎮宗都給予「未來女婿」滿分，大讚他有禮貌和踏實。去年發生「安心事件」的黃心穎亦大方祝福舊愛馬明︰「祝福佢身體健康、平安。佢私人嘅事留番畀佢回應。」而熱戀中的馬明和靚湯，前晚凌晨分別出po，貼上定情信物公仔，並留言︰「獨角和小馬跟大家說︰大家全部窩心的祝福，我們全收了，我們會懷着感恩珍惜的心一直走下去。」

昨日早上11時許，靚湯以全黑打扮返回無綫電視城準備開工，大批傳媒即上前恭喜她「脫單」，靚湯露出甜笑連聲多謝，但婉拒透露何時開始拍拖。靚湯表示兩人由傾偈開始萌生戀情︰「我都單身咗兩年，期間有追求者，有了解過，但發覺唔啱傾，依家同馬明覺得好啱傾。」提到雙方已經見家長，湯父湯母更大讚馬明值滿分，靚湯笑指太誇張，馬明讚她性格簡單易滿足，靚湯即「回禮」狂讚他︰「佢都好孝順、善良、冷靜、成熟同穩重，大家都好錫父母又咁宅，同埋佢畀好多安全感我。」

靚湯早前頂替黃心穎重拍《法證先鋒IV》，現在又戀上馬明，她見到心穎會否尷尬？靚湯說：「暫時唔會諗，仲未發生，亦唔識答。」並稱其實很久沒聯絡心穎。而不少網民向「明湯戀」送上祝福。

唐詩詠估中但唔敢爆料

此外，馬明契妹唐詩詠昨日現身電視城，自爆個多個月前已估到馬明和靚湯拍拖，但沒有追問對方，「佢（馬明）從來唔講，只係畀咗個emoji同講多謝。（你無like佢哋認愛貼文？）我同七成朋友喺社文網上都係零互動，呢件係開心事，唔好無風起浪。（靚湯啱做你阿嫂？）我有乜所謂，最重要係佢（馬明）同佢阿媽鍾意。（同馬明傳緋聞咁多年，終於甩難？）做兄弟無所謂，都講咗咁多年，請我食飯補償，同埋煲靚湯畀我飲就得。」

撰文︰Pat

採訪︰Pauline

編輯︰陳禮恒

美術︰Simon

攝影︰林良明