抗炎期間拍廣告 苟芸慧獲老公升級防疫保護

「幸福人妻」苟芸慧（苟姑娘）日前為地產按揭公司拍攝新一輯廣告，拍足12小時亦未見疲態。她表示難得在疫情下有工開，非常感恩，但老公陸漢洋對拍攝時的防疫措施卻超級緊張。

新冠肺炎病毒肆虐，娛樂圈工作亦大受影響，苟姑娘表示︰「的確有好多工作延期，如果年底疫情仲係咁嚴重，可能都未必做到。」她又指掛念在加拿大的家人，「本身打算返加拿大，因為爹哋、媽咪、細佬都喺嗰邊，好想返去見佢哋，但可惜依家飛唔到；我亦好想去旅行，惟有睇旅遊節目當去咗，有時播緊旅遊節目，我會叫老公幫我喺電視機前影相，當去咗。」

提到今次在疫情下開工拍廣告，苟姑娘表現雀躍，問她出門拍攝可有做足防疫措施？苟姑娘即沒好氣表示︰「我老公超級緊張，反而我就隨遇而安，大家戴口罩、量體溫、用消毒搓手液洗手已經好安全，但我老公就緊張到會買啲垃圾袋嚟笠晒啲凳、鋪晒啲枱，搞到好唔方便，我明白佢嘅出發點為我好，但有時似乎過分緊張。」

疫情過後開班整甜品

此外，苟姑娘自言對投資沒有太多心得，她正努力學習，但會偏向「買磚頭」保值。有否打算開甜品店？她回應稱︰「有打算開班授徒，將自己識嘅嘢教畀人，等佢哋可以整甜品畀身邊嘅人食，係一件好開心嘅事，所以我有同朋友商量，待疫情過後，租個地方輪流教學生。」

撰文︰Pauline

編輯：陳禮恒

美術：梁政敏