留宿大澳拍《踩過界II》外景 蔡思貝：當小學生去宿營

蔡思貝昨日現身將軍澳電視城，正趕拍新劇《踩過界II》的她，提到劇組將拉大隊到大澳拍外景，眾人要留宿一星期，思貝開心表示可以當作短期修行，又乘機重拾讀書時宿營的樂趣。

蔡思貝在《踩過界II》再演哨牙妹「癲姐」，其短髮造型更刻意多露一點面部，方便上輯已有的左臉「刀疤」連戲。快將煞科的《踩過界II》因疫情影響，原定的緬甸外景改為到大澳拍攝，屆時為爭取時間，劇組上下要在大澳留宿一周趕戲。思貝說：「因為拍攝嘅地方屬於禁區，出入比較麻煩，每次車程都要兩個鐘，所以喺嗰度留宿方便啲。」

思貝笑言到時日日着戲服拍攝，所以不會帶太多行李：「我諗住乜都唔帶，收工已經好攰，我會立即瞓覺，邊度都唔去。啱啱好一個禮拜，我會當係修行，又好似小學生去旅行咁，細個都試過喺香港宿營，諗起都幾興奮。」

吊威也拍追逐戲

思貝透露大澳外景會有多場動作戲，除了飛車外，更有遊艇連環追逐戲，她說：「今次我要喺遊艇上面救『盲俠』（王浩信），到時要跑跑跳跳同吊威也，我盡可能都會親身上陣。好似《機場特警》有場戲我要跳落海救細路仔，親身拍攝嘅好處係唔使下下就住鏡頭，所以係好值得嘅，我睇番場戲都覺得好開心。」

她笑言因角色全程要保護「盲俠」，所以早已預計要拍多場動作戲：「其實最難頂係天氣已經開始熱，我啲戲服好多係毛毛領衫同厚衫，所以好辛苦。之前有場戲我同張振朗喺天台拍，曬到頭昏腦脹，我都唔知自己做緊乜。」

採訪︰Pauline

攝影︰林良明

編輯：李潔盈

美術：梁政敏