30歲農曆生日勁識歎 吳業坤食魚生識日本妹

吳業坤（坤哥）明天30歲生日，不過他前日率先慶祝自己的農曆生日，分享多張與媽媽「食好西」的相片，吳媽媽更在社交網與網民一唱一和，開口表明恨飲新抱茶。吳業坤昨日回覆《晴報》時笑說︰「媽咪講笑啫，佢想我搵多啲錢先諗娶老婆。」

吳業坤最近與馬國明、岑麗香拍攝無綫新劇《BB大晒》，雖然拍攝進度受疫情影響，但坤哥因而有時間與家人慶祝農曆生日。他前日在IG上載在家中慶生的相片，壽星仔選擇與家人吃日本菜到會，枱上放滿不同種類的魚生和壽司，十分豐富。坤哥留言說︰「今日坤爺三十歲農曆生日同天后誕，唔食番餐東洋嘢點得呢，希望大家年年有今日，身體健康、長命百歲、百無禁忌。」

不少網民留言祝賀他，當中有人說︰「吳業坤媽媽個笑容暗示想飲新抱茶喎，祝你快啲成家立室，唔好再做無腳嘅雀仔。」吳媽媽即回覆對方︰「都想㗎！」公然向坤哥催婚。

想擴闊生活圈子

坤哥昨日接受本報電話訪問，笑言與家人慶生非常開心︰「媽咪係一個好傳統嘅人，佢每年都好想同我慶祝農曆生日，但我每次都要開工，今年咁啱唔使開工，所以特登陪下屋企人。」問他何時達成媽咪想飲新抱茶的心願？坤哥說︰「我諗佢講笑啫，媽咪成日同我講，叫我搵多啲錢先，佢想我有穩定嘅事業先諗娶老婆。」

問坤哥現在可有心上人？他說：「未有，我要擴闊自己生活圈子先，最近喺東京同關西都識咗啲朋友仔，佢哋話會介紹女仔畀我識，都識咗一、兩個女仔，大家都係普通朋友，但疫情關係都無得飛過去探佢哋，我有學日文，可以做住筆友先。」

撰文︰倪小珊

編輯︰李潔盈

美術︰梁政敏