同是霆鋒舊愛 趙學而爆與盧巧音有偈傾

蘇永康與趙學而昨日到九展為ViuTV節目《Chill Club》錄影，擔任主持之一的趙學而早前與盧巧音（Candy）世紀合唱一曲《垃圾》，樂迷反應熱烈，就連鄭秀文前晚亦在社交網唱出這首好歌。

趙學而與Candy合唱受讚，學而表示︰「可能最近音樂節目少咗，加上好耐無喺電視見到Candy，同埋佢啲歌真係好好聽，（大家讚你唱得好！）作為歌手我只係做最基本嘅事，唔失禮就已經好好。」

對於網民把焦點放在她與Candy同是謝霆鋒舊愛，學而帶笑表示︰「其實我同Candy私底下都經常聯絡，依家社交平台咁方便，我哋經常傾下買餸同埋食嘢，有時煲湯都會請教佢。大家似乎好奇怪咁，呢個地球係圓嘅，（往事？）其實開心咪得囉，唔開心嘅記嚟做乜，最好就係以歌會友。」至於會否考慮邀請霆鋒上節目？她說由電視台安排。

蘇永康難效法Sam開Live騷

蘇永康早前與許志安一同為慈善機構派口罩，蘇永康表示︰「其實無刻意去講，呢啲係人同天嘅事，心安理得就可以，其實安仔都有自己去做善事，Sammi也有去洗樓派口罩囉，我覺得呢啲事不分宗教，希望大家健健康康就好。」另外，他又提到歌神許冠傑在周日義唱為通利琴行前演唱會工程部員工籌款，蘇永康表示歌神的歌曲有勉勵作用，問到他可會效法？他笑言自己的歌以情歌為主，不太適合開網上騷。

採訪︰Pauline

攝影︰林良明

編輯：黃寶恩

美術：顏玉玲