44歲生日開Live 梁詠琪笑囡囡亂入搶鏡

梁詠琪（Gigi）前日44歲生日，由於新冠肺炎肆虐，Gigi只跟家人簡單食飯慶祝，晚上則在IG開live與粉絲傾偈兼獻唱，期間她的五歲女兒祈淑菲（Sofia）多次亂入，獲網民稱讚勁cute。Gigi昨日接受《晴報》訪問時，大談生日願望︰「當然係疫情盡快過，人人身體健康。」

壽星女梁詠琪在直播唱出多首經典歌，又分享在家抗疫的生活︰「每日除咗陪Sofia上網做功課，亦會焗下麵包同蛋糕，又教佢做家務。」直播期間，Sofia多次入鏡打招呼，更拿着ukulele與媽咪「jam歌」，可愛度爆燈。

Gigi昨日接受本報訪問，提到囡囡Sofia亂入時，哈哈大笑說︰「個女很好奇，我喺房做直播，佢同爸爸喺客廳睇，覺得好神奇，所以不停走入房，確定我係咪真係喺屋企。佢知有好多哥哥姐姐睇緊，都好想同大家打招呼。」

為前綫醫護打氣

Gigi指最近大家多數留守家中，所以開live為大家解悶，並特別選唱《平安夜》和《至少還有你》，為前綫醫護人員打氣。提到老公Sergio的家鄉西班牙疫情嚴峻，Gigi說︰「我哋每日都同當地屋企人通電話，提醒佢哋唔好外出，要經常洗手。我哋教老人家上網購物同玩遊戲，希望佢哋乖乖留喺屋企。」

撰文︰倪小珊

編輯︰李潔盈

美術︰梁政敏