Bob麥玲玲拖手唱《好好戀愛》 網民︰笑到停唔到

林盛斌（阿Bob）前晚在無綫《流行經典50年》與麥玲玲（玲玲姐）合唱經典情歌《好好戀愛》，二人唱得投入，卻竟然充滿笑點，演出片段在網絡洗版。不少網民笑爆這對最佳熒幕情侶襯到爆；有觀眾更戲言邊聽邊笑睇到打冷震！

玲玲姐早年曾與農夫合唱《風生水起》，今次她與阿Bob重新演繹方力申與鄧麗欣的經典情歌《好好戀愛》。阿Bob和玲玲姐曾在電影《我要發達》合演夫妻，因此默契十足，前晚在《流行經典50年》拖手合唱時四目交投，玲玲姐唱到尾段更捉實阿Bob的手放在自己的鎖骨上，震撼觀眾眼球。

至於二人的唱功，以非歌手來說歌喉絕對不失禮，阿Bob演唱時甚為肉緊，玲玲姐亦唱得感情澎湃，很多視迷熱捧二人的合唱版本可以流行經典50年；有花生友更戲言樂壇欠這對另類CP一個交代。

阿Bob︰盼做最佳熒幕情侶

昨午，阿Bob回應本報時稱︰「我都知係驚嚇咗少少，對受影響嘅人士講聲唔好意思，哈哈，其實都係為《我的筍盤男友》宣傳，純粹搞下笑，搞下氣氛，希望大家睇得開心！」他又感謝各位網友和觀眾關注，並笑言︰「玲玲姐話我哋係2020年最佳熒幕情侶組合，可以一齊出去登台撈嘢，今次發達嘞！（可有被兩位原唱者投訴？）哈哈！我都唔知！」

至於玲玲姐早前亦向本報透露，為了這次獻唱，她事前特別搵歌唱老師上堂，又跟阿Bob一齊練歌，非常用心。

撰文︰Steven、Pat

協力︰Terri

編輯︰黃寶恩

美術︰梁政敏