武漢登台返港 陳豪抱囡囡前要全身消毒

近日武漢爆發不明肺炎，本港醫院亦接收曾赴武漢的求診病人。陳豪與李佳芯（Ali）前晚在電視城演出《慈善星輝仁濟夜》，原來陳豪剛從武漢登台回港，他坦言此行除工作外，其餘時間都「自我隔離」，回港後亦第一時間洗澡消毒以策安全。

日前從武漢返港的陳豪，前晚一現身便被取笑為「帶菌者」，李佳芯見到他時亦扮作彈開，場面搞笑。陳豪表示武漢工作是一早接下，出發前兩日才知當地的肺炎疫情，衡量風險後仍決定出發。他說︰「喺當地我基本上除咗去上台表演同搭飛機，其餘時間都留喺酒店房，早餐都喺房度食，隔離自己。不過我見當地市面都無乜事，活動都無握手環節。」

陳豪自言家中有小孩，所以特別小心注意衛生︰「返到屋企個女想撲上嚟，我都叫佢等一陣，我第一時間換晒衫、沖涼同全身消毒，整理乾淨先去抱佢。」他表示回港時亦有檢測體溫，確認沒有發燒。

李佳芯唔信男友被炒

與陳豪同台演出的Ali，得悉對方由武漢返港後說︰「如果佢有咩唔舒服，我就幫佢頂一頂啦！」Ali表示剛放完假，放假期間去了旅行，問到是否與男友陳炳銓同行？她表示此行是去探朋友，而男友早前亦較忙，所以沒有同行。提到早前她被拍得與男友行街時黑面，她笑說︰「好多人問我係咪唔開心，可能我唔笑就似黑面。（相處好sweet？）正常情況，都咁多年。」有傳陳炳銓面臨被ViuTV解僱，Ali表示沒聽男友提過，相信並非事實。

撰文︰Pauline

編輯︰李潔盈

美術︰梁政敏