帶兩個寶貝仔遊主題樂園遭偷拍 栢芝：尊重別人私隱

張栢芝在元旦日攜同二子Quintus及細仔Marcus（張禮承）等到訪迪士尼樂園，她又在IG上載相片分享喜悅，想不到卻惹來男記者到園區追訪。身為慈母的栢芝反拍對方並將照片放上網，勸告對方不要偷拍小朋友及尊重私隱。很多影迷讚她勇敢保護囝囝；有人亦熱捧栢芝盡顯母愛！

前日是踏入2020年第一天，栢芝帶同家人到香港迪士尼享受假期，同行者包括Quintus、Marcus及多位小朋友，估計是Quintus的同學仔。貴為大明星的栢芝打扮搶眼，粉紅色冷帽配彩色上衣，又親自照顧一歲細仔Marcus，未有假手於工人姐姐，可算是廿四孝媽媽。

玩足兩日冀子盡興

雖然栢芝上載的IG相中未見12歲的大仔Lucas同行，但二仔Quintus亦不愁寂寞，他與其他小朋友玩得超開心，從IG片段所見，Quintus與朋友仔瘋狂揮動《星球大戰》的激光劍，看來他們也是該片的粉絲。

另一條片則見到栢芝孭實Marcus，而Quintus擺出多個搞笑表情搶鏡，並說︰「新年快樂！開開心心！」栢芝透露除夕當天曾到迪士尼樂園，今次是連續兩日到訪園區，更玩足十次Space Mountain，戲言玩到嘔。她亦稱︰「希望所有小朋友都記得佢哋2020年1月1日喺迪士尼好開心，呢個就係我嘅願望，亦都希望大家開開心心。」

收拾心情北上吸金

不過，由於細仔Marcus的容貌從未曝光，栢芝攜子到訪樂園即惹來傳媒追訪，她亦不甘示弱，反拍該男記者並將照片放上IG的限時動態，更以水果圖片遮掩對方的樣子，可說非常厚道。她又留言︰「這位先生請不要偷拍小朋友和尊重別人的私隱。」至於網友就齊撑栢芝護子有理；有粉絲亦支持藝人應有自己的私生活。

事實上，早前曾有傳Marcus的父親是外國人，但據知Marcus的樣子圓潤可愛，惟五官卻無外籍人士的高鼻樑特徵。此外，栢芝昨日更新IG已現身內地機場，相信是北上搵奶粉錢。

撰文︰Steven、Pat

協力︰Carol

編輯︰黃寶恩

美術︰Simon