結束4年情 馮盈盈爆喊︰相處容易同住難

馮盈盈與醫生男友鍾文浩（Martin）拍拖四年本應非常甜蜜，兩人早前更一齊買樓共賦同居，不過盈盈昨日早上突然在社交網發表分手宣言。消息更指盈盈與張頴康在《解決師》的濕身激咀戲成為分手導火綫。

昨午，盈盈現身電視城參與新劇《逆天奇案》拜神儀式，並首度開腔談及分手內情，她表示跟男友經過和平及理性處理，分手絕不涉及第三者，兩人已搬離愛巢及做回朋友。盈盈表示︰「呢個決定都經過深思熟慮，既然決定咗亦無謂一直隱瞞，順理成章話畀大家知，分咗手都一段時間，係今個月嘅事。」

至於分手原因，盈盈大方透露︰「可能相處容易，同住難。同居之後，發現最舒服都係做番朋友，但無話再見不是朋友。」至於兩人同居的單位是由盈盈付首期，她表示單位會有方案公平處理，但暫時不會賣樓。期間，盈盈提到跟Martin拍拖的日子，一同經歷和成長，兩人互相祝福，不會為分手感到遺憾，說時一度爆喊。對於盛傳分手是與張頴康的激情戲有關，盈盈否認︰「同工作上唔太大關係，佢一直都好支持我。」

至於同場的張頴康得知盈盈甩拖感到傷心，他表示︰「個女仔上緊位都肯講畀人聽有男朋友，所以好想佢哋好。（同你拍激情戲導致分手？）我想同佢男友講，我同盈盈都好唔想拍呢場戲，但大家都係演員，盈盈亦都好保護男友。」

撰文︰倪小珊

攝影︰林良明