拍《無雙》槍林彈雨 發哥︰以前揸槍係斷估咋

周潤發、郭富城、廖啟智及英皇集團主席楊受成等，昨日到中環「大館」（前中區警署建築群）出席新片《無雙》發布會。發哥在戲中飾演無雙集團的行政總監，有多場槍戰戲，他自爆今次有專人訓練學揸槍，唔似得以前拍揸槍戲都只是「斷估」。

發哥透露去年五月至八月拍攝《無雙》，期間到加拿大溫哥華及泰國清邁拍外景。城城踢爆發哥最辛苦，既有槍林彈雨場面，又要吊威也。發哥直言久未拍槍戰戲，覺得過癮又開心。是否重現《英雄本色》Mark哥的雙槍戲？他笑說︰「乜槍都有，水槍都有，依家拍槍戰戲比80年代唔同，以前導演諗到乜就拍乜，拍完唔要又得，我揸槍都係斷估咋，但依家拍戲成本貴，統籌更精準，甚至安排training學揸槍，真係活到老學到老，不過我係聰明嘅學生。」

發哥又表示做了運動後身手敏捷，更戲言「十個郭富城都死」！他又指城城是其「啟蒙老師」，皆因合作《大鬧天宮》時得悉城城收工後仍在房間做運動，於是有樣學樣，結果連肝炎也痊癒。

兩人曾在《大鬧天宮》及《寒戰2》合作，但發哥坦言今次拍《無雙》的合作最「嘭嘭聲」，「今次係拍住上，有你就有我，見少日都死！（唔捨得？）城城有兩條女啦，仲要我咩？佢有大嚤囉和細嚤囉（妻女），個女仲係金笸籮，佢識叫爸爸未呀？」城城笑謂女兒只是牙牙學語，未懂叫爸爸。

張建聲拒評《全民造星》

此外，同場的張建聲擔任ViuTV節目《全民造星》評判，被網友鬧太多廢話，他自稱已被禁聲，不會再評論事件，亦謂以後會審慎考慮才任評判，皆因跳唱非自己專業，可能做戲劇評判更適合。阿聲又澄清節目經過剪輯，才顯得他長期黑口黑面。

採訪︰Pauline